CAGAYAN DE ORO CITY – Misaka pa sa lima ka brgy ang apektado sa impeksyon sa mga baboy nga dala sa African Swine Fever o ASF dinhi sa syudad.
Kini human kompirmaha ni City Veterinary Office head Dr Anthony Acac nga mohimo sila sa ‘culling operations’ sa mga baboy nga naigo sa ASF sa Brgy Macasandig ug Agusan ning syudad.
Gibutyag ni Acac nga tuyo niini nga dili makatabok sa laing brgy ang ASF ilabina nga una nang naigo ang Brgy Mambuaya,San Simon ug Baikingon sa miaging mga adlawa.
Nabalaka usab si Acac nga hayan madugayan pa ang pagkawala sa ASF kon walay klaro nga pangontra niini ang kagamhana.
Samtang gipaubos sa culling ang 173 ka baboy sa Brgy Baikingon ning syudad. Kini human masuta nga nasudlan na usab sa African Swine Fever ang maong barangay.
Gibutyag ni Baikingon Brgy Kapitan Nathan Yanez nga ang maong mga baboy ang gipanag-iyahan sa 40 nila ka residente.
Dugang sa opisyal nga posibleng nasudlan sila tungod sa mga baboy nga gidala sa mga komprador gikan sa Brgy San Simon ning syudad.
Dugtong niini,hugtanon nang gimonitor sa mga opisyal ang tulo nila ka mga Sitio nga apektado sa pag igo sa African Swine Fever (ASF) sa Brgy Macasandig ning syudad.
Gibutyag ni Macasandig Brgy Kagawad Mario Bolanio nga nagpadayon usab ang ilang gihimong profiling sa mga nanag-iyag baboy.Miingon si Bolanio nga nagtoong nakuha ang virus sa ilang lugar pinaagi sa gibahog nga lamaw.
Sa pikas bahin,nabalaka ang mga magba-baboy sa Northern Mindanao nga modaghan pa ang mga lugar nga maigo sa African Swine Fever.
Gibutyag ni NorMinHog Raisers Association Pres Leon Tan Jr. nga kon dili mapugngan ang pagkaylap sa virus hayan moundang sa pagpamuhi ang ilahang mga kauban sa mga baboy dinhi sa rehiyon.
Miingon si Tan nga gumikan niini, paghuman sa usa katuig mabati na ang pagkunhod sa suplay sa baboy.
Alayon niini,gitahasan ni City Mayor Oscar Moreno ang kapolisan nga hatagan sa pag-abag ang mga brgy nga mohimo’g hugot nga checkpoints sa matag-utlanang bahin sa syudad.
Kini human ilugwa ni Moreno ang mando ehekutibo nga nagpahugot sa mga pagbiyahe sa mga baboy nga peligro sa impeksyon sa African Swine Fever.
Una na nang mitala sa sobra libo ka mga baboy ang na-cull o napatay sa tulo sa lima ka brgy saa syudad nga nasudlan sa ASF.
