CAGAYAN DE ORO CITY – Gibulgar ni kanhi Taglimao Brgy Kap William Guillani nga si ABC president Kag Alam Lim ang nagsugo kaniya aron kasuhan sa kurapsyon si City Mayor Oscar Moreno sa Ombudsman sa una pa niining termino sa syudad.
Miingon si Guillani nga mismo si Lim ang tighatagan kaniya sa salapi matag-higayon nga modalikyat kini sa kauluhan aron ma-follow up kaniadto ang kaso batok Moreno.
Gibakwi ni Guillani ang iyang mga pahayag kaniadto dinhi sa Bombo Radyo nga walay nagsugo kaniya sa pagkaso kang Moreno.
Dumduman nga gitangtang sa Ombudsman si Moreno tungod sa isyu sa kompanyang Ajinomoto apan napugngan kini sa Court of Appeals o CA-Mindanao.
Samtang gihimakak ni Lim ang pasangil nga siya ang utok sa pagpakaso batok City Mayor Oscar Moreno.
Miingon si Lim nga ordinaryo nga negosyante lamang siya ug walay makuha nga mihuras sa city hall kon tinood ang pasangil batok kaniya.
Namahayag ang opisyal nga dili na niya tumpangan si William Guillani kay naka-pokus kini sa pagtabang sa mga tawo nga apektado sa COVID-19 sa syudad.
Dumduman nga mismo pa si Cagayan de Oro 1st District Rep Rolando ‘Klarex’ Uy ang nag-facilitate kang Alam aron makapaduol ug magpasakop kang Moreno kaniadto.
