(Update) CAGAYAN DE ORO CITY – Gipangunaya’g duaw ni Cagayan de Oro Archdiocese Most Reverend Jose Cabantan ang yano nga plastar sa haya sa kolehiyala nga gidunggab-patay sa wala ilhi pa nga responsable sa Zone 4,Sitio Dinogon,Brgy Sta Ana,Tagoloan,Misamis Oriental.
Kini human nakaabot sa atensyon sa arsobispo ang makalolooy nga gidangatan sa biktima nga si Lady Grace Galo,19 anyos kinsa aktibong youth minister ug altar server sa Santa Ana Parish sa maong lungsod nga naligo sa kaugalingong dugo sulod sa gihigdaan niini sa kuwarto sa miaging semana.
Nangulo sa paglitok sa mga pag-ampo si Cabantan samtang personal nagpaabot sa iyang pasubo ngadto sa pamilyang Galo ug mga kabanay tungod sa hitabo.
Susama sa pamilyang Galo ingon man kahigalaan ug Tagoloan Community College diin nagtungha ang biktima,gusto usab sa arsobispo nga mapadali ang pagkab-ot sa hustisya.
Si Lady Grace kinsa nagpahulay lang sulod sa kuwarto tungod sa iyang binulan nga bisita ang hilom nga gisulod sa wala ilhing suspek diin gidudaha nga gisulaya’g lugos apan kini misukol rason nga gidunggab hinungdan sa kamatayon niini.
Kasamtangang na unta 2nd year college na si Lady Grace sa kursong Bachelor of Science in Business Administration sa TCC apan dili na kalampos tungod sa iyang subo nga gidangatan.
Hisayrang unang gi-imbestigaran sa Tagoloan Police Station ang unom ka trabahante nga duol sa lokasyon sa crime scene apan gipangbuhian kay walay lig-ong mga basehan nga modugtong sa hitabo.(Photo by Kent Philip Eduave).
