CAGAYAN DE ORO CITY – Nagbunga sa positibong resulta ang wala pag-undang sa pangindahay nga makab-ot ang pagsilbing usa sa mga abogada dinhi sa dakbayan.
Kini ang gipaambit sa take 4 bar passer nga si Atty. Jusan Rochel Sabio Arellano gikan sa Liceo de Cagayan University College of Law dihang tipik sa nakapasar sa pasulit sa abogasiya sa miaging Setyembre ning tuiga.
Miingon si Arellano nga tinood nga dili sayon ang pag-kontrol sa kaugalingon kon dili gilayon makapasar sa bar exam.Apan siya mipaambit nga wala kini mohunong pagsampit sa Ginoo aron makasugakod sa sunod-sunod nga pagsulay sa gisudlan nga propesyon.
Dugtong niini,mogahin una kini’g igong panahon nga mo-serbisyo publiko kay nagtrabaho man kini sa usa sa mga regional trial court dinhi sa syudad.
Samtang gipaambit usab sa kanhi empleyado sa city hall ang iyang mga giagian samtang naninguha makat-on ug makatapos sa kursong abogasiya aron mahimong usa sa mga manlalaban dinhi sa syudad.
Miingon ang bar passer nga si Atty Izelle Fuentes nga angay lang gyud andamon ang kaugalingon sa gisudlan nga pangandoy aron may direksyon sa pagkab-ot niini kinuyugan sa kakugi ug mga sakripisyo.
Si Fuentes kinsa anak usab ni Ian Fuentes nga dugay nang nag-trabaho sa city govt ang unang mikuha sa kursong Bachelor of Arts major in Mass Communications and Media Studies sa UP Visayas sa Iloilo City ug nagkuha sa abogasiya sa University of San Carlos College of Law.
