CAGAYAN DE ORO CITY-Ipasaka na ang kasong illegal drugs selling ubos sa Dangerous Drugs Act of 2002 kon RA 9165 batok sa giilang bigtime drug pusher nga nadakpan pinaagi sa drug buy bust operation sa Singapore,Bgry Balulang ning syudad.
Giila ni C/Insp Gilbert Rollen,hepe sa City Drug Enforcement Unit ang dinakpan nga si Abdul Madid Ali, 47, lumad nga taga Marawi City.
Nakuha sa posisyon ni Ali ang 57 gramos nga gimbug-aton sa gitoohang shabu nga nagkantidad sa dul-ag P400-mil.
Una niini, migamit pa sa laing pangalan ang suspek ug namugos nga siya taga Iligan City.
Gani, gipalig-on pa sa daghang mga nadakpan sa CDEU nga si “Ali” ang ilang gitudlong dakung supplier sa ilegal nga druga sa tibook Northern Mindanao.
Kasamtangang balhog sa Maharlika detention cell ang suspek.
