CAGAYAN DE ORO CITY – Ipatawag sa committee on the whole ang tanang billboard owners o operators nunot sa gitakdang hearing niini sa konseho sunod semana.
Kini human unang gibulgar sa special report ni SK Federation President John Michael Seno ang pipila ka illegal billboard structures nga gipanag-iya sa pamilya ni Kag Lordan Suan.
Miingon si City Vice Mayor Kikang Uy nga tuyo niini nga mahatagan sa ensaktong tubag gikan sa nagkadaiyang ahensiya sa gobierno ang pasangil nga nasupak sa pamilyang Suan ang balaod sa maong klase sa patigayon.
Ang pamilyang Suan ug Uy ang pulos dunay billboard business operations dinhi sa syudad sa dugay nang katuigan.
Samtang gitawag ni Suan nga ‘misleading’ o dunay paglipat sa katawhan ang presentasyon sa special report sa alyado ni City Vice Mayor Kikang Uy nga mao si Seno sa konseho ning syudad.
Miingon si Suan nga nagpakita sa kakulang sa hanaw ang alyado sa bise-mayor kabahin sa tinud-anay nga kontrata tali sa Ultracraft Advertising ug city govt nga gilayong gitoohan sa pipila ka sakop sa mayoriya sa konseho.
Miingon si Suan nga angay lamang nga dunay imbestigasyon aron maklaro kon kinsa kanila ni Uy ang dunay dayag nga mga pagsupak sa mga balaod sa bilboard constructions ning syudad.
