CAGAYAN DE ORO CITY – Dili igsapayan sa city hall nga mabulit sa pagsaway sa katawhan niining pagpang apod-apod sa ECQ special ayuda sa dakbayan.
Gibutyag ni City Administrator Teddy Sabugaa nga dawaton nila ang mga pagsaway basta ipaniguro lamang nila nga mahuman nga hapsay ang pagpangtunol sa tabang pinansyal.
Miingon si Sabugaa nga dili sayon ang trabaho sa ilang mga personahe diin kinahanglan pang mangadlawon pagsaka sa mga bukid aron mahatag ang tabang sa katawhan.
Unang mikatag sa social media ang mga listahan sa pipila ka brgy nga dunay nagdoble nga mga pangalan sa benepesaryo gikan sa Brgy Camaman-an ug Brgy Balulang ning syudad.
Samtang gikasakit sa pipila ka brgy opisyales ang nadawatan nila nga pag-akusar sa ilang residente nga giingong personal nga gipang-konsumo ang ayuda alang sa katawhan.
Gibutyag ni Brgy Pagatpat Kap Roel Gabo nga nabulit sila’g pasangil sa ilang mga residente nga daw gipangbahin-bahin na nila ang ayuda nga nadawat gikan sa gobierno.
Miapelar si Gabo nga dili unta maghinobra sa pasangil ang katawhan kanila ug iyang giklaro nga wala sila manghilabot sa ayuda.
