CAGAYAN DE ORO CITY – Inihap na lang ang adlaw sa pipila ka giingong mga empleyado sa city hall nga nalambigit sa kurapsyon pinaagi pagsilbing fixers ngadto sa mga kliyente nga nagkinahanglan sa serbisyo sa nagkadaiyang buhatan sa pangagamhanan lokal sa dakbayan.
Miingon si City Mayor Rolando ‘Klarex’ Uy nga igo paghuman sa pasko,ipatawag niya ang maong mga empleyado aron manubag batok sa pasangil nga sila daw makililimos nga mangayo’g salapi sa magbubuhis nga dunay transaksyon sa city hall.
Siya miingon nga dako niyang kontra ang mga empleyado sa gobierno nga pahimudsan ang katawhan pinaagi sa pagpanapi kanila bugti sa serbisyo nga ilang makuha.
Saysay ni Uy nga hawid na niini ang mga pangalan ug mga impormasyon sa maong mga empleyado rason nga igo paghuman sa pasko,tagsa-tagsao kini niya’g patawag.
Maoy nakaabot sa mayor nga mopasalig ang pipila ka empleyado nga mapirmahan ang mga dokumento sa mga kliyente niini sa hingtungang department manager bugti sa ihatag nga salapi.
Dugang ni Klarex nga mas pilion niya ang pagpanalipod sa katawhan itandi sa pipila ka empleyado nga naghimo’g mga hinangal.
