CAGAYAN DE ORO CITY – Gisugyot ni contact tracing czar Baguio City Mayor Benjamin Magalong nga ipalig-on pa ang koordinasyon sa health workes ug kapolisan sa matag-local govt unit o LGU sa nasud.
Kini aron epektibo nga mapatuman ang contact tracing sa mga tawo nga direct contact sa mga positibo sa coronavirus disease pandemic.
Miingon si Magalong nga susama sa usa ka criminal investigation ang maong trabaho aron masubay ang mga tawo nga nagdala-dala sa bayrus.
Gihimo ni Magalong ang komento nunot sa iyang pagbansay ang frontliners nga gilakipan sa mga pulis ug health workers ning syudad sa miaging adlaw.
Nasuta ni Magalong nga wala usab makapasar sa national standard sa IATF ang contact tracing capability nga gihimo sa syudad.
Apan alang kang City Mayor Oscar Moreno mas sundon niini ang istratehiya ni city epidimiologist Dr Joselito Retuya nga pag-contact trace sa mga tawo nga natakdan sa coronavirus disease sa syudad.
Miingon si Moreno nga gitahod ug nakadayeg siya sa performance ni Magalong apan mas komportable kini nga ipadayon ang mga paagi ni Retuya aron pugngan ang pagsaka COVID-19 infection sa dakbayan.
Una nang gibutyag ni Magalong nga tulo sa upat ka infected nga residente ang napasagdan nga naglakaw-lakaw rason sa pagsaka sa COVID-19 case sa dakbayan.
