CAGAYAN DE ORO CITY- Nagisa sa konseho si CSWD officer Teddy Sabugaa tungod sa pasangil nga daghang pamilya pa ang wala mahatagi’g ayuda human maigo sa baha sa syudad sa miaging Enero 16 ning tuiga.
Kini human miduol ang pipila ka brgy kapitan sa konseho aron ipaabot ang ilang reklamo batok CSWD.
Miingon si Kag Leon Gan nga mismo sila ni Konsehal Nadya Emano- Elipe ang mihimo’g pakisusi diin 5 ka barangay ang wala mahatagi’g ayuda sa CSWD.
Samtang gipanalipdan ug nakahatag sa igong ayuda ang CSWD sukwahi sa pasangil sa kampo nila ni Gan ug Elipe.
Kini ang gipasabot ni Sabugaa atol sa iyang pag-atubang sa konseho sa sesyon kagahapong adlawa.
Gibutyag ni Sabugaa nga kon aduna may ulahi nahatagan gumikan kini kay sila nagsilbing nabahaan lamang apan wala mawad-i sa mga pinuy-anan.
Kabahin sa mga barangay nga langan ang ayuda ang naglakip sa kabarangayan sa Lapasan,Kauswagan,Puerto ug Tablon nga naigo usab sa pagbaha.
Samtang gilayong lingkuran sa komite on social services sa konseho ang sugyot nga giduso sa buhatan sa CSWD ning syudad.
Kini aron matuki ang protocol nga angay i-adaptar sa syudad ug kabarangayan kon subli maigo sa pagbaha ang katawhan.
Gibutyag ni Kag Rueben Daba kinsa chairman sa komitiba nga angay ipadaplin una ang politika ug maghiusa aron dili masubli ang pagbinasulay sa miaging pag-igo sa baha sa syudad.
Libuang pamilya ang apektado samtang may upat ka tawo ang nakalas gumikan sa maong kalamidad.
