CAGAYAN DE ORO CITY – Giakushan sa pipila ka sakop sa city council nga dunay ‘mis-management’ o pagpasagad sa sanitary landfill o basuran nga gidumala sa City Local Environment and Natural Resources Office diha sa Brgy Pagalungan ning syudad.
Kini human gibutyag ni committee on public safety chairman Kag Romeo Calizo nga makit-an sa maong basuran ang giingong ‘health hazardous’ nga klase sa mga basura kay napasagdan ang pagbantay niini.
Nagsumikad ang reaksyon ni Calizo sa special report ni committee on environment chairman Kag. Roger Abaday nga hayan sa landfill gipanglabay ang ubang hospital waste materials tungod kay walay klaro nga pasilidad nga gihuptan ang syudad alang niini.
Kini ang rason nga giuyunan nga susihon kini sa komitiba sa panglawas ni Kag. Malou Gaane ug Abaday aron matin-awan ang maong isyu.
Samtang gikataw-an lamang ni CLENRO manager Engr. Armen Cuenca ang pasangil nga sila nagpasagad sa ilang pagpadagan ug pagdumala sa city landfill sa dakbayan.
Kini ang tubag ni Cuenca batok sa akusasyon ni Calizo sa isyu.
Miingon si Cuenca nga dakong bakak ang panaghap nga dunay mga abulansya nga galabay sa ilang hospital waste sa maong basurahan kay dili kini basta-basta itugot sa dakbayan.
Giangkon usab niini nga dunay treatment facility sa hospital waste sa maong basurahan apan mihunong una ang operasyon samtang gi-comply ang gabayan nga gisitar sa DENR ug EMB.
