CAGAYAN DE ORO CITY-Gusto karon sa mga namimuyo sa duha ka brgy nga apektado sa gilugwa nga ‘duga’ gikan sa sanitary facility diha sa Pagalungan nga may dinalian nga aksyon ang mga opisyal ning syudad.
Kini samtang dili pa dako ang epekto sa maong hugaw nga mikontaminar sa panubig sa sapa nga nag-una nga tinubdan sa panginabuhian sa mga nagpuyo sa Brgy San Simon sa dakbayan.
Miingon si San Simon Brgy Kag Fernando Edralin nga may gipasar na sila nga resolusyon kabahin sa maong problema aron mahataga’g aksyon ilabina sa konseho sa syudad.
Una nang gipasalig sa komitiba sa panglawas sa konseho nga mohimo sila’g pag-imbestigar kabahin sa tinood nga hitabo sa maong basurahan sa Brgy Pagalungan ning dakbayan.
Samtang gipasalig karon ni CLENRO officer Edwin Dael nga ilang mapasabot ug maayo ang isyu batok sa giingong pag-leak sa ‘duga’ gikan sa sanitary landfill sa Brgy Pagalungan ning syudad.
Kini human direktang apektado ang pipila ka residente sa maong ‘duga’ nga mipadulong sa sapa diin tinubdan sa panginabuhi sa Brgy San Simon sa dakbayan.
Miingon si Dael nga gikatingala nila kon unsay basehan sa mga pasangil nga may mga isda nga nangamatay ug gipang-kurikong nga mga residente sa maong lugar.
