CAGAYAN DE ORO CITY-Ilusad sa incident management team o IMT ang operational briefing sa command center sa City Disaster Risk Reduction and Management Dept o CDRRMD sa syudad ning adlawa.
Kini human activated na ang IMT subay sa mando ni City Mayor Oscar Moreno epektibo karong buntag.
Miingon si CDRRMD head Allan Porcadilla nga tuyo sa operational briefing nga mahatagan sa pinal nga instruction ang naglangkob sa IMT nga ikatag sa lain-laing assignment sa syudad ugmang adlawa.
Partikular nga tutukan sa IMT ang mga simbahan ug mga kapilya sa Malasag ug Berhin sa Guadalupe diha sa Brgy Cugman ug Brgy Tablon sa syudad.
Samtang gipaniguro sa naglangkob sa Provincial Disaster Risk Reduction and Managment Office o PDRRMO nga anaa na sa igong kaandam ang puwersa mohatag seguridad sa nilibong mga deboto nga modagsa sa religious sites sa Misamis Oriental.
Kini human gipatawag ni Gov Bambi Emano pinaagi sa PDRRMO ang militar,kapolisan ug ubang grupo aron masiguro ang luwas ug balaang pamalandong sa mga deboto sa lalawigan.
Miingon si PDRRMO head Fernando Dy Jr nga kabahin sa gihataga’g hugot nga pagbantay ang Divine Mercy Shrine sa El Salvador City ug Sipaka Heights sa Talisayan ning lalawigan.
