CAGAYAN DE ORO CITY – Gi-aktibo na ni City Mayor Oscar Moreno ang incident management team o IMT nga magdumala sa katibuk-ang seguridad sa kapistahan sa dakbayan.
Kini aron masiguro nga dili mabalda ang mga kalihukan nga konektado sa kapistahan ni Sr San Agustin sa Agosto 28 ning tuiga.
Miingon si Moreno nga gipasiguro niini kang City Director Police Col Henry Dampal kuyog ang force multipliers ang hugot nga seguridad aron masanta ang bisan unsa nga pagpanabotahe sa mga kalihukan sa dakbayan.
Samtang gisugdan na sa Cagayan de Oro City Police Office o COCPO ang deployment sa mga pulis nga magbantay sa kahusay ug kalinaw sa kasaulugan sa kapistahan ni Sr San Agustin ning syudad.
Gikompirmar ni City Police Director Police Col Henry Dampal nga all set na ang ilang preparasyon aron maseguro ang seguridad ug kaluwasan sa katawhan sa mga aktibidadis nga himoon sa dakbayan.
Siya miingon nga nakadawat na sila’g approval gikan sa National Telecommunications Commission alang sa ipatuman nga signal jamming sa outdoor activities.
Una nang nagpahimangno si Dampal nga ilang idili sa matag aktibidadis ang pagdala sa mga backpack, pagsul-ob ug kalo, sun glasses ug daghan pang uban.
