CAGAYAN DE ORO CITY – Miduso sa resolusyon si City Councilor Edgar Cabanlas aron tun-an sa upat ka komitiba sa konseho ang sugyot nga pagbalhin na sa historical location sa city hall ning syudad.
Kini sa tuyo nga mausa ang nagkadaiyang buhatan sa kagamhanang lokal ug dili hasol sa mga magbubuhis kon sila mohimo’g mga transaksyon sa umaabot panahon.
Gibutyag ni Cabanlas nga gusto niini nga tun-an kini’g maayo sa konseho ug sa buhatan sa mayor aron tumbukon ang lugar nga mabalhinan ug magbaton sa igong pondo nga gamiton sa katukuran niini.
Gumikan sa kagamay sa espasyo sa city hall,mismo sila ang maglisod na’g parking ug labaw sa tanan ang katawhan nga dunay katuyuan sa dakbayan.
Samtang miani sa mayoriyang suporta ang sugyot ni Cabanlas nga pagbalhin sa city hall sa laing lugar dinhi sa dakbayan.
Miingon si Kag Romeo Calizo,chairman sa committee on police,fire and public safety nga salikwaot kaayo nga mismo pa ang mga serbisyo sa city hall ang dili organisado diin naghatag kahasol sa katawhan.
Gisugyot ni Calizo angayang masuta usab sa buhatan sa mayor kon may nakahan-ay na ba o wala pa nga long term plan alang niini.
Samtang giuyunan ni trade and commerce committee chairman Kag George Goking ang kagustuhan sa mayoriya nga mobiya na ang city govt sa old location sa city hall ug mangita’g mas dako nga espasyo nga balhina niini.
Apan giklaro sa konsehal nga dako siya nga supak kon mangahas ang city govt nga ibaligya ang yuta ug istraktura sa kasamtangang city hall kay puno kini sa kasaysayan.
Siya miingon nga maka-sustiner ang dakbayan nga mangita’g pondo pinaagi sa pagpangutang aron gamiton sa pagtukod sa bag-ong city hall.
