CAGAYAN DE ORO CITY – Gikasuko ni Provincial Gov Bambi Emano kon nganong gihilabtan ni City Mayor Oscar Moreno ang pagpasira ni Provincial Health Officer Dr Jerie Calingasan sa ospital sa Balingasag,Misamis Oriental.
Kini human natala ang local transmission sa coronavirus diin upat ka administrative staff ang natakdan sa maong ospital.
Miingon si Emano nga ang kanunay pagpanghilabot ni Moreno ang nagpakita lamang kon unsa ka dako ang kasuya niini sa paningkamot ni Calingasan nga pugngan ang dugang kaso sa bayrus sa lalawigan.
Sa 25 ka lungsod ug duha ka syudad sa lalawigan,upat na lamang niini ang wala masudli sa COVID-19.
Samtang pagpakabana lamang ang gihimo ni Moreno kon nganong naka-komento kini sa pagpasira sa provincial hospital sa Balingasag,Misamis Oriental.
Kini human bati-a ni Moreno ang kadako sa perhisyo sa katawhan nga modangop sa maong ospital aron mangayo’g serbisyong medikal.
Namahayag ang mayor nga tungod sa giingong dili han-ay nga sistema sa lalawigan,katag-katag ang diskarte sa mga lungsod kon unsaon ang pag-atiman sa mga pasyente nga natakbuyan sa bayrus.
