CAGAYAN DE ORO CITY-Naghinam-hinam na si kanhi Taglimao Brgy Kap William Guillani sa suspension order nga ipahamtang sa Malakanyang batok kang City Mayor Oscar Moreno.
Kini nunot na sa iyang giduso nga reklamo kang Pres Rodrigo Duterte sa pagtoo nga ilegal ang gihimo ni Moreno nga P79 million bank withdrawals sa tuig 2015.
Si Guillani miingon nga kun ugaling mapamatud-an nga may probable cause ang iyang reklamo , dako ang posibilidad nga langkaton sa pwesto si Moreno.
Samtang kampante ang kampo ni Moreno nga ilang mapamatud-an sa Office of the President nga walay illegal nga gihimo ang opisyal nunot na sa reklamo ni Guillani.
Matud ni special legal counsel Atty Dale Brian Mordeno nga cleared na sa Commission on Audit o COA kon unsay ilang giggamitan sa maong kantidad.
Gani, gibutyag niini nga ilang padalha’g mga dokumento si Duterte nga magpamatood nga walay kamatooran ang maong akusasyon.
Una nang gipamugos ni Guillani nga dili pamulitika ang reklamo nga iyang giduso batok kang Moreno.
Siya miingon nga bisan ang iyang pamilya ang naapektuhan tungod sa iyang mga kasong gipasaka batok sa mga pulitiko.
Asoy pa niini nga nagmahay siya sa ubang ahensiya sa gobyerno tungod kay bisan ang pagpanarbaho sa iyang anak
naapektuhan kay dili dawaton, mahadlok nga maangin sa pulitika.
Giakusahan usab niya ang ubang mga pulitiko nga nagkunsabo aron hinungdan nga walay nagsuporta kaniya.
Gipanganti usab ni Mordeno nga ilang limpyohan ang ngalan ni Moreno sa Office of the President.
Kini pinaagi sa pagpakita’g ebidensiya nga na- settle na ang maong acount subay sa record sa Commission on Audit .
Una nang gimanduan sa Malakanyang si Moreno nga moduso sa tubag kabahin sa findings sa COA kabahin sa pag-with draw sa P79 milyones sa magkalahing higayon gikan sa mga bangko ning syudad.
