CAGAYAN DE ORO CITY-Kumpiyansa ang city officials pinanguluhan ni Mayor Oscar Moreno nga mamintinar ang hugot nga seguridad aron pabilin ang kahusay’g kalinaw sa syudad.
Kini bisan sa kalit nga pag-relib sa puwesto kang City Police Director Sr/Supt Robert Roy Bahian ug gihulipan ni Sr/Supt Nelson Aganon gikan sa Regional Mobile Force Batallion o RMFB-10.
Miingon si Kag Romeo Calizo,chairman sa police,fire and public safety sa konseho walay isyu kon dili taga-dinhi si Aganon samtang mangulo sa kapolisan sa syudad.
Nagtoo si Calizo nga sama kaniya masabtan ni Moreno kon nganong si Aganon ang gibutang ni PNP regional director C/Supt Timoteo Pacleb nga acting police director sa syudad.
Nasayran nga wala makatunga si Moreno apan si Calizo ug Kagawad Jay Pascual ang mitambong sa turn-over of command tali Aganon ug Bahian sa headquarters sa Cagayan de Oro City Police Office o COCPO sa Barangay 40 ning syudad sa miaging Lunes sa hapon.
