CAGAYAN DE ORO CITY-Gipahikay na ni PDP-Laban president Senador Koko Pimentel ang mahimo nilang aksyon sa ilegal nga annual assembly sa grupo ni Atty Rogelio Garcia.
Kini human nagpili’g bag-ong mga opisyal ang grupo ni Garcia nga wala mangayo’g pag-uyon gikan kang PDP-Laban chairman President Rodrigo Duterte.
Miingon si Pimentel nga kasuhan sa partido sila si Garcia kon makit-an nga dunay igong basehan nga nadaot ang imahen sa PDP-Laban nga gihagu’ag tukod ni sa iyang amahan former Senate President Aquilino ‘Nene’ Pimentel Jr.
Samtang gipadumdom sa grupo ni Garcia kang Pimentel ang wala niini pagkapili nga regular sa ilang mga miembro.
Kini ang tubag ni Garcia kinsa nag-claim usab nga presidente sa partido sa bahad ni Pimentel nga sila kasuhan.
Miingon si Garcia nga hulaton nila ang sumbong nga ipasaka sa grupo ni Pimentel aron masayran kon kinsa kanila ang anaa sa ensakto ug angay tuuhan sa katawhan.
