CAGAYAN DE ORO CITY – Daw nahukasan na sa maskara kon kinsa ang tag-iya sa pasilidad sa Philippine Offshore Gaming Operations o POGO nga nakabase sa Alwana Compound sa Brgy Cugman ning syudad.
Kini resulta sa padayong imbestigasyon sa quadropole committee hearing kabahin sa kalambigitan ni kanhi Bamban Mayor Alice Guo sa mga kalihukang ilegal sa POGO.
Nagisa si Cagayan de Oro City Police Office Director Col Salvador Radam sa maong pagdungog diin siya gipangutana ni Quadcom member Cong. Dan Fernandez kon kinsa nag-operate sa maong pasilidad.
Limitado ang nasayran ni Radam apan mismo na si Fernandez ang mibulgar nga gipanag-iya kini sa Chinese national nga si Yang Jian Xin nga nagpaka-Pinoy nga dunay pangalan nga Antonio ‘Tony’ Maestro Lim alyas Tony Yang ug kamagulangang igsoon ni Michael Yang nga kanhi presidential economic adviser ni former Pres Rodrigo Duterte.
Sa maong pagdungog,nabulgar usab nga si Tony Yang ang tag-iya sa locator nga Shangjia Steel Corporation nga nakabase Philippine Devt Authority o Phividec sa Tagoloan,Misamis Oriental.
Gi-alegar usab nga maong korporasyon ni Yang dunay istraktura sulod sa Phividec diin gidudahan nga gadunggo ang mga kontrabando sama mga bugas,ilegal nga droga ug uban pa.
Gani,giingong kanhi na nadakpan ang smuggled rice transaction ni Yang nga gipalusot sa iyang negosyo nga Yangtze Group Trade Company Incorporated nga Golden Sun Cargo Examination Services Corporation nga nakabase ning syudad.
Si Yang nga nagdala sa official address nga nakabase sa Yakal Street,Brgy Cugman ning syudad.
Hisayrang nanglugwa ang mga impormasyon nga sulod-gawas si Yang sa Camp Alagar kon dunay mga dagkong aktibidad ug kaila usab sa pipila ka local media dinhi sa syudad.
