CAGAYAN DE ORO CITY-Nominado ubos sa Cagayan de Oro City Police Office o COCPO isip most outstanding police officer of the year si Lumbia Police Station commander Sr/Insp Dennis Ebsolo.
Gibutyag ni COCPO spokesperson C/Insp Mardy Hortillosa nga si Ebsolo ang i-representar kuyog ang laing police nominees sa PNP-10 aron sila pilian nga i-submitar sa MetroBank Foundation sa kauluhan.
Si Hortillosa miingon nga si Ebsolo lamang sa mga station commanders ubos sa COCPO nga nakasunod sa kuwalipikasyon nga gipangayo sa maong foundation alang ning tuiga nga awarding.
Giangkon ni Ebsolo nga maglisod kini’g tuman sa mga rekisito nga gipangayo sa bank foundation diin mohatag pasidungog sa govt workers nga dako’g natabang sa katilingban.
Kini tungod sa kalisod sa pipila ka rekisito nga gipangayo alang niini.
Si Ebsolo miingon nga buhaton nila kutob sa ilang mahimo ang paghupot sa gipangayong mga papeles aron dili maulahi ang kapolisan sa syudad.
