CAGAYAN DE ORO CITY-Makabalik na sa iyang trabaho kon gustuhon sa kontrobersyal nga si principal Dr Arnold Tejero nga mo-report diha sa City Central School ning syudad karong adlawa.
Kini ang pahayag ni Dr Rosalio Vitorillo,head sa governance operation sa DepEd Cagayan de Oro nunot sa pagkabuhi-i na ni Tejero human makapiyansa sa korte batok sa kasong child abuse ning syudad kagahapong adlawa.
Gibutyag ni Vitorillo nga bisan sa krisis nga giatubang ni Tejero ingon man sa asst principal niini nga si Rudy Villalobos apan nagpabiling normal ang pagtudlo sa mga maestro ug maestra sa libuang tinun-an sa maong tunghaan sa dakbayan.
Si Tejero ug Villalobos ang pulos gikasuhan sa child abuse sa pipila ka ginikanan hinungdang gilugwaa’g warrant of arrest sa korte sa miaging adlaw.
