CAGAYAN DE ORO CITY – Gi-depensa ni City Mayor Rolando ‘Klarex’ Uy ang pagdeklara sa state of emergency nunot sa isyu sa panubig sa syudad.
Miingon ang mayor nga angayang buhaton kini sa city government aron pugngan ang mga posibleng sabotahe nga mopasamot sa atubangon nga suliran sa katawhan sa dakbayan.
Namugos si Uy nga wala unsaa sa iyang gipabantay nga mga pulis ang mga trabahante sa Rio Verde Water Consortium Incorporarted sa Barangay Pualas,Baungon,Bukidnon.
Kini aron unta temporaryong palungon ang water isolation valve subay sa mando sa Cagayan de Oro Bulk Water Incorporated o COBI kay pabiling nagmagahi ang Cagayan de Oro Water District o COWD sa ilang bayrunon sa gipalit nga tubig.
Kasamtangang gipabantayan sa mga pulis ug mga sundalo ang bisinidad sa Rio Verde hangtod nga wala pa’y sulbad ang COWD-COBI payable issue.
Hisayrang pirmado sa COBI ug Rio Verde ang temporary water cutoff order nga mosugod unta Mayo 1 sa kadlawon epekto sa pakyas nga pagkab-ot sa sulbad sa April 30 meeting sa Metro Pacific Water ug COWD nga gipatawag ni Local Water Utilities Administration o LWUA kay gihangyo ni Cagayan de Oro 1st District Rep.Lordan Suan.
