CAGAYAN DE ORO CITY – Gawasnon sa kasamtangan ang sikat nga video blogger nga si Sulpicio Calceña alyas Sophie Gazini Smith o mas naila nga si Queen Angkol bisan kon unang gimando sa korte nga kini dakpon sa mga otoridad ning syudad.
Kini human usab itugot ni RTC Branch 11 Presiding Judge Ramon Bueno Daomilas Jr nga hatagan sa temporaryong kagawasan kon makapiyansa si Queen Angkol sa 10-mil pesos batok sa kasong online libel nga naduso didto sa Cebu City.
Miingon si Regional Anti-Cyber Crime Unit 10 chief Police Lt Lemuel Gonda nga mapiyansahan ang maong kaso rason nga wala ra maabti’g 24 oras ug gilayong nabuhian ang akusado kinsa taga- Zone 8,Bigaan,Brgy Cugman ning syudad.
Si Calceña gidakop sa hiniusang operasyon sa PNP gamit ang warrant of arrest sa Phil State Subd.,Brgy Gusa sa syudad kagahapon sa buntag.
Gisulaya’g kuha sa Bombo Radyo ang panig sa 28 anyos nga akusado apan nagdumili na kini pag-komento sa hitabo.
