CAGAYAN DE ORO CITY-Negatibo sa paggamit sa gidiling droga si City Vice Mayor Rainer Joaquin ‘Kikang’ Uy ug ang laing 15 ka konsehales sa konseho ning syudad.
Kini human sorpresa nga gipaubos sila sa random mandatory drugtest samtang nag-regular session sa konseho.
Gibutyag ni Kag Romeo Calizo,chairman sa komite sa police,fire and public safety sa konseho nga napalig-on sa iyang mga kaubang opisyal ang kredibilidad sa syudad nga anaa sila sa seryoso nga kampanya kontra gidiling droga.
Nanganti usab si Calizo nga dili pa luwas sila si Kag Bong Lao ug Kag Eric Salcedo sa drug test kay bugtong sila lamang ang wala makuhai’g urine sample sa PDEA-10 ug kapolisan ning syudad sa miaging adlaw’ng Lunes.
Samtang dili palabyon sa City Anti-Drug Abuse Council o CADAC ang tanang empleyado sa city hall aron mapaubos sa random mandatory drug test ning syudad.
Kini human negatibo ang bise-mayor ug halos tanang konsehal sa konseho sa drug test nga gipahigayon kanila sa miaging adlaw’ng Lunes.
Gibutyag ni CADAC chairman Kag Romeo Calizo nga walay lusot ang mga empleyado niini kay tulo ka balaod ang nagmando kanila aron ipaubos sa drug test.
Nasayran nga kapin 6-mil ka empleyado ang ipaubos sa drug test nga naglakip sa city hall employees ug brgy elected officials.
