CAGAYAN DE ORO CITY-Gipasalig karon sa kadagkuan sa Rio Verde Water Consortium nga mabalik na sa normal ang suplay sa tubig sa kasadpang bahin sa syudad sa adlaw’ng Biyernes.
Gisaad kini ni Engr Joeffrey Hapitan,operation manager sa Rio Verde atol sa pagpatawag kanila sa public utility committtee sa konseho kuyog ang Cagayan de Oro Water District kagahapong adlawa.
Gihimo nga rason ni Hapitan nga apektado ang ilang water pipeline tungod sa pagtay-og sa linog sa Bukidnon sa miaging Setyembre 24 ning tuiga.
Nangayo’g pasaylo si COWD General Manager Engr Rachel Beja sa dakong perhisyo sa mga konsimidor nga gikan sa unang distrito sa syudad ug pipila ka bahin sa Opol,Misamis Oriental.
Giangkon ni Beja nga nakat-on na sila nga angay magbaton pa sa dugang kakuhaan sa tubig aron dili mag-antos ang mga konsumante.
Gibatikos sa katawhan ang serbisyo nga gihatag sa COWD ug Rio Verde diin ang uban kanila migamit na lamang sa mineral water aron ipang-kaligo.
Susihon sa miembro sa konseho ning syudad ang actual site sa water pipe sa Rio Verde Water Consortium nga giingong apektado sa linog sa Pualas,Bukidnon ning semanaha.
Kini human gi-rason sa kadagkuan sa Rio Verde ang pagkaguba sa ilang water pipe hinungdan nga mihinay ang suplay sa tubig sa dakbayan.
Gibutyag ni Kag Bong Lao Jr,chairman sa committee sa public utility sa konseho nga mismo si Hapitan ang nag-imbitar kanila aron makita ang apektado nga water pipe line niini.
