Photo credit: Nef Lucson
CAGAYAN DE ORO CITY-Natanggong ang libuang pasahero ug motorista sa pagbaha epekto sa kusog nga pag-ulan diin apektado ang pipila ka brgy sa syudad.
Kini human nagsaka ang tubig-baha sa Bitan-ag creek ug pipila ka open drainage sa mga lugar nga ilado nga flood prone ug low lying area sa dakbayan.
Gibutyag ni City Disaster Risk Reduction and Management Department head Allan Porcadilla nga kabahin sa grabeng nabahaan ang Lapasan, Carmen, Puntod, Kauswagan, Upper Balulang, Brgy 22 ug Brgy 26 diin misulod ang baha sa daghang kabalayan.
Nangapalungan usab sa mga makina ang daghang sakyanan ug motorsiklo samtang gisubay ang nag-unang highway sa CM Recto ug Kauswagan.
Gitumbok ni Porcadilla nga ang kadaghan sa basura ug kulang nga drainage system nga pakyas matubag sa syudad ang kabahin sa rason kon nganong kanunay maigo sa pagbaha sama kagahapong adlawa.
Samtang apektado ang libuang residente o gatusang pamilya sa pagbaha nga nanimuyo sa Brgy 26 ning syudad.
Kini ang gikompirmar Brgy 26 Kap Alberto Adecer diin ang kabahin ang iyang panimalay sa gatusang pamilya nga nasudlan sa tubig-baha tungod sa pagbundak sa kusog nga ulan sa syudad.
Miingon si Adecer nga hinoon walay dakong kadaot sama sa pagkaguba sa mga panimalay ang natala sa ilang brgy apan may usa ka tawo nga nasamdan tungod sa pagka-bulasot sa bangag epekto sa kalawom sa tubig.
Nasayran nga napugos pagkanselar sa klase ang mga tigdumala sa USPT diha sa Brgy Lapasan tungod sa lawom nga tubig nga anaa sa ilang tugkaran.
