CAGAYAN DE ORO CITY – Direktang giaghat sa University of the Philippines OCTA Research Team ang liderato sa Cagayan de Oro local govt unit nga pangitaa’g sulbad ang nagka-grabe nga pagsaka sa ihap sa mga tawo nga natakbuyan sa COVID-19.
Kini human kabahin ang syudad sa area of concern gumikan sa sobra 5-mil na ka kaso sa bayrus sukad nasudlan sa tuig 2019.
Gibutyag ni Professor Dr Guido David sa OCTA Research Team nga hinoon masaligon sila nga dali mapangitaan sa paagi kon unsaon ang pag-contain sa local transmission sa bayrus ilabina kon dunay tinud-anay nga kooperasyon sa katawhan.
Gawas sa syudad,area of concern usab tungod sa bayrus ang syudad sa Puerto Princesa,Palawan ug Bacolod City,Negros Occidental nga pulos na gawas sa National Capital Region.
Samtang gikompirmar ni Philippine vaccine czar Sec Carlito Galvez Jr ang pagsilbing area of concern sa dakbayan tungod sa taas nga ihap sa mga tawo nga infected sa COVID-19 sulod ning bulana.
Gibutyag ni Galvez nga ang epektibo nga vaccination rollout ang usa sa ilang nakita nga tubag aron santaon ang paspas nga pagsaka sa COVID-19 sa dakbayan.
Kini usab ang rason nga kabahin ang Northern Mindanao diin nasakop ang Cagayan de Oro nga gipadal-an sa tipik sa sobra 2 milyon nga doses sa Astrazeneca vaccine gikan sa COVAX vaccine nga nakaabot sa nasud sa miaging adlaw’ng Sabado.
Una nang gikompirmar usab sa city health office nga anaa na sa 136 ka empleyado sa city hall ang naigo sa bayrus dinhi sa dakbayan.
