CAGAYAN DE ORO CITY – Pakusgon pa sa city govt ang isolation ug ubang health protocols nga kasamtangang gipatuman sa dakbayan nga gipaubos na sa IATF sa enhanced community quarantine o ECQ epektibo kagahapong adlawa.
Gibutyag ni City Mayor Oscar Moreno nga makakurat ang pagkasudli sa syudad sa COVID-19 delta variant apan angayang dili lamang magpataranta ang katawhan samtang kini gipakigbatukan.
Miingon si Moreno nga gikinahanglan pag-ayo ang kooperasyon sa katawhan tungod sa ka-delikado sa virus variant nga miigo na sa lima ka residente sa dakbayan.
Samtang gipatuman na usab sa Gingoog City ang border control sa mga barangay nga nakadugtong sa mga utlanang bahin sa ubang lungsod sa Misamis Oriental.
Kini human kabahin ang maong dakbayan nga gipaubos sa enhanced community quarantine tungod sa unang kaso sa COVID-19 Delta variant.
Miingon si Gingoog City Mayor Eric Caniosa nga dili lamang angay magmataranta ang matag-residente kay himoon nila ang tanang lakang nga pugngan ang pagkuyanap sa delta variant.
Gitigom ni DoH 10 regional director Dr Jose Llacuna ang LGU officials sa Gingoog City nunot sa ECQ restriction kagahapong adlawa.
Dugtong niini,dili na ihinayon ni Gov Bambi Emano ang pagtugot sa 50 percent capacity sa mga tourist spot sa Misamis Oriental.
Kini human napaubos sa General Community Quarantine ang lalawigan tungod sa COVID-19 delta variant sa Gingoog City.
Gibutyag ni Emano nga mas hugot nga restrictions ang ilang gipatuman aron pugngan ang dugang impeksyon sa virus variant.
Dugtong niini,gihupay sa Department of Trade and Industry 10 ang kabalaka nga mahutdan sa batakang suplay sa panginahanglan ang mga tawo sa mga lugar sa rehiyon sama sa Cagayan de Oro ug Gingoog City nga ubos sa Enhanced Community Quarantine.
Gibutyag ni DTI-10 spokesperson Julie Nieva nga sinto poryento gihapon ang pag operate sa patigayon nga dunay pagtugot sa IATF nga nagbaligya sa basic goods.
Gitin-aw usab ni Nieva nga dili lisod ang pag byahe sa mga nag unahang panginahanglanon ilabina nga may mga priority lane kini sa mga quarantine control point.
Samtang gilayong gi-anunsyo ni Cagayan de Oro Archbishop Jose Cabantan nga walay ipahigayong santos nga misa ang tanang simbahan sa Cagayan de Oro tungod sa Enhanced Community Quarantine.
Gibutyag ni Fr. Der John Faborada, Director sa Social Communication Apostolate sa Archdiocese sa Cagayan de Oro nga naghulat pa sila sa kamanduan ni City Moreno.
Dugang ni Faborada nga samtang naghulat, gipahibalo niini nga magpadayon ang online masses alang sa mga deboto.
Hisayrang kabahin ang simbahan nga misunod sa tanang protocols nga gipatuman sa dakbayan.
