CAGAYAN DE ORO CITY – Walay kabag-uhan apan hugtan pa kon gikinahanglan ang ipatuman nga health protocols nga kasamtangang nasinatian sa katawhan sa syudad.
Kini ang gipasabot ni City Mayor Oscar Moreno nunot sa mando ni DILG Sec Eduardo Año nga subli gipaubos ang syudad sa modified general community quarantine o MGCQ tungod sa bahad sa coronavirus disease pandemic.
Miingon si Moreno nga nagsulat na unta kini kang Año nga tugtan siya nga ipadayon ang kaugalingong gabayan pag-alkontra sa bayrus apan paspas ang pag-usab sa hukom sa Inter Agency Task Force.
Samtang igawas ning adlawa ni Gov Bambi Emano ang bag-ong mando ehekutibo kabahin sa gabayan nga mapanalipdan ang seguridad sa panglawas sa katawhan sa Misamis Oriental batok sa coronavirus disease 19.
Kini human una nang nahupay ang gobernador sa bag-ong kamanduan sa IATF nga mabalik sa general community quarantine ang probinsya gikan sa ‘low risk’ status kontra bayrus nga nasabutan sa kauluhan sa niadtong adlaw’ng Lunes.
Miingon si Emano nga walay angay ihatag nga kumpiyansa ang katawhan bisan pabiling negatibo sa COVID-19 positive ang lalawigan apan gasaka usab ang ihap sa mga tawo nga natakbuyan dinhi sa syudad.
