Gisugyot ni City Mayor Rolando “Klarex” Uy nga ipailalom sa state of energy emergency ang tibuok syudad sa Cagayan de Oro aron hatagan ug gahum ang lokal nga kagamhanan sa pag-atubang sa nagsamot nga krisis sa lana sa Pilipinas.
Masaligon ang mayor nga suportahan kini sa City Council nga nakatakdang magpulong karong adlawa aron aprobahan ang sugyot.
Kung kini mapalabang ug mahimong ordinansa, magamit dayon ang pondo alang sa emergency response nga ibubo sa mga bulnerabli nga sektor sama sa mga drivers nga apektado sa pagsaka sa presyo sa lana, solo parents nga nagkinahanglan ug dugang suporta, mga mag-uuma ug mangingisda nga nag-atubang sa taas nga gasto sa produksyon, lakip na ang mga Persons with Disabilities (PWDs) nga mas sensitibo sa epekto sa krisis.
Milaum si Mayor Klarex nga mas mapalig-on ang kapasidad sa syudad sa pag-atubang sa krisis ug masiguro nga walay sektor sa katilingban nga mabiyaan.
