CAGAYAN DE ORO CITY-Gialerto ni City Disaster Risk Reduction and Management Dept o CDRMMD head Allan Porcadilla ang publiko kabahin sa dautang panahon dala sa bagyong Urduja.
Kini bisan nga dili grebeng apektado ang kinatibuk-ang syudad sa mata sa maong bagyo nga anaa sa Eastern Visayas.
Miingon si Porcadilla nga angay magbantay lamang ang mga residente sa mga lugar nga sagad maagian sa pagbaha o pagdahili sa yuta ilabina kon dugay mohunong ang mga pag-ulan.
Sayran nga gisuspenso ang tibuok adlaw nga klase sa mga magtutudlo ug mga tinun-an sa Lapasan National High School sa Brgy Lapasan ning syudad.
Kini human apektado sa pagbaha epekto sa pagbundak sa ulan sukad pa sa miaging gabii.
Miingon si Dr Merly Puzon sa maong tunghaan nga una kining gi-report sa ilang school principal sa DepEd School City Division diin gilayon usab nga gimando ang pag-suspenso sa klase.
