AMINADO si City Economic Enterprises Business Development Administration (CEEBDA) Head Atty. Marianne Raagas nga nadismaya siya sa pagpagawas sa unverified nga report kabahin sa giingong leptospirosis cases sa syudad.
Sumala ni Raagas, nakahatag og dakong alarma ang maong isyu, ilabi na kay nasayod siya nga direktang maapektohan ang mga vendors sa Cogon Public Market, ug maapil pa ang ubang mga merkado sa syudad tungod sa pag-generalize sa pulong nga “merkado.”
Butyag ni Raagas, nasabtan niya ang tinguha ni CUMVA President Engr. Franklin Dagcuta nga ipadayag ang isyu, apan angay una unta kini i-verify ang impormasyon sa husto nga buhatan sa dili pa ipagawas sa publiko.
Gipasabot niya nga ang walay basihanan nga report makahatag og kahadlok sa katawhan ug makadaut sa panginabuhian sa mga vendors, ilabi na sa sulod sa Cogon Public Market.
Giklaro usab ni Raagas atol sa press conference nga ang Cogon Public Market ra ang nalambigit sa isyu ug wala maapil ang ubang mga merkado sa syudad.
Sa maong press conference, gideklarar na nga “case closed” ang isyu ug giingon nga dili leptospirosis ang hinungdan sa pagkamatay sa usa ka vendor sa Cogon Public Market. (JAMES OLIVER)
