Celtics, gitambakan og 39 big points ang Hornets

Gitambakan sa Boston Celtics ang Charlotte Hornets og 39 big points sa pag-atbangay sa duha ka koponon, karong adlawa, Nobyembre 7, 2026.

Wala mapugngi sa Hornets ang dominanteng run sa 2024 NBA Champion, diin sa paghuman sa first quarter pa lamang kay nasinati na niini ang 20-point deficit.

Sa paghuman sa 3rd quarter, nisamot og kadako ang tambak ngadto sa 39 big points, hangtud sa hingpit nang mahuman ang dula sa iskor nga 119-80. Sa sulod lamang sa 29 minutos nga pagdula ni Boston Star Jayson Tatum, nakatampo siya og 34 ka puntos, walo ka rebounds, siyam ka assists, tag-usa ka steal ug block.

Nagpaulan og 3 pointers ang koponan ug nakapasulod og 24 ka tres gikan sa 44 ka attempt niini, diin nahimo nila kini pinaagi sa 53 porsiyento nga 3-point shooting.

Sa laing bahin, 11 lamang ka tres ang nahimong balos sa Hornets. Wala makakita og tubag ang Hornets sa episyente nga dula sa Boston diin ang beteranong forward lang nga si Naz Reid ang nakahimo og double-digit nga puntos sa mga starters sa Charlotte, pinaagi sa iyang 14 ka puntos ug unom ka rebounds.

Wala usab makaporma ang forward nga si Grayson Allen ug sulod sa 22 minutos nga iyang pagdula, wala gyud kini bisan usa ka puntos nga nasulod.

Kini na ang ikapitong kadaogan sa Celtics, diin duna silay duha ka pildi, samtang gihuptan usab sa Charlotte ang rekord nga 3-7. (raniel mahunyag)