Mipadayag ang Center for Youth Advocacy and Networking Inc. sa ilang padayon nga adbokasiya nga nagtutok sa pagmonitor sa kahimtang sa mga pampublikong eskwelahan pinaagi sa proyekto nga Multiply‑ED.
Sa panayam sa Bombo Radyo, si Mark Alcazar, project officer sa Center for Youth Advocacy and Networking Inc., miingon nga ang Multiply‑ED usa ka inisyatiba kauban ang Government Watch nga nagtutok sa pagtan‑aw sa kalidad sa serbisyo nga nadawat sa mga senior high school learners sa nagkalain‑laing bahin sa nasud.
Dugang pa niya, sakop sa ilang monitoring ang mga lugar sa NCR, Visayas, Laguna, Palawan, Cagayan de Oro, BARMM, ug General Santos aron masiguro nga makita ang tinuod nga kahimtang sa mga eskwelahan.
Giingon usab niya nga karon nagpadayon ang Youth‑Led Educational Inform Regional Conference diin gipresentar sa publiko ang ilang findings kabahin sa mga kakulangon ug panginahanglan sa mga eskwelahan.Pinaagi niini, gilauman nga makahatag og tukmang tubag ang DepEd regional, division, ug national offices aron matubag ang mga identified gaps sa edukasyon.
Gipasiugda sa grupo nga ang ilang adbokasiya nagtinguha sa mas transparent ug responsive nga sistema sa pampublikong edukasyon alang sa kabatan‑onan.
