CAGAYAN DE ORO CITY, Philippines – Mitanyag sa 5-Milyon pesos nga pahalipay ang negosyanteng si Chavit Singson para kang Olympic double gold medalist – Carlos Yulo apan adunay usa ka kondisyon.
Gusto ni Singson nga subling makauban ni Yulo ang iyang pamilya.
Gipa-ambit ni Singson ang iyang gibating kasubo dihang mibusikad ang report kalabot sa pangit nga tinagdanay ni Carlos ug sa iyang inahan. Gibutyag sa kanhi Ilocos Sur Governor nga gibati niya ang kasakit sa inahan ni Carlos nga nagdumot sa iyang anak, ug nasakitan nga wala siya imbitaha.
Una niini, giangkon ni Singson nga dili sayon ang panag-uli sa inahan ug anak tungod sa panagbangi apan, siya nagpadumdum nga ang panaghigugmaay sa pamilya maoy pundasyon sa kalambuan sa mga anak niini.
Dumduman nga nabuak ang relasyon ni Carlos sa iyang pamilya human gibasol sa iyang inahan ang hinigugma niini nga si Chloe San Jose, kinsa usa ka pinay nga nakabase sa Australia.
