Gipasakaan sa reklamo sa graft ug plunder si kanhi Narvacan, Ilocos Sur Mayor Luis “Chavit” Singson ug 15 pa ka opisyal sa lungsod human sa pagsumite sa Warriors Ti Narvacan, Inc., nga gipangulohan ni Atty. Estelita Cordero.
Ang pormal nga reklamo gisang-at sa Office of the Ombudsman.
Gibutyag sa mga nagreklamo, adunay anomalya sa pagpalit sa 99,974-square meter nga propyedad gikan sa Western Textile Mills niadtong 2019, nga gipalit sa kantidad nga ₱149.96 milyon, bisan pa nga ang zonal valuation niini ₱49.98 milyon ra kuno.
Gituohan nga halos ₱100 milyon ang posibleng kadaot sa kaban sa lungsod tungod sa maong transaksyon, nga giilang isip ill-gotten wealth ilawom sa Republic Act No. 7080 (Plunder Law).
Sa pagkakaron, gipadayag ni Singson nga bakak ang mga pasangil ug gitawag kini nga usa ka “desperadong diversionary tactic” samtang nagpadayon ang imbestigasyon sa mga awtoridad.
