CAGAYAN DE ORO CITY-Gikakurat sa Commission on Higher Education o CHED-10 ang akusasyon nga giatubang sa duha ka opisyal sa Tagoloan Community College o TCC diha sa Tagoloan,Misamis Oriental.
Kini human nanglugwa ang pipila ka tinun-ang babaye diin nag-akusar batok kanila ni TCC Vice President for Academic Affairs Dr Frederick Gomez ug Dean of Student Affairs Dr Roger Anthony Gamale sa isyu nga ‘sex for grade’ sa maong lungsod.
Miingon si CHED regional director Raul Alvarez Jr nga seryoso ang alegasyon rason nga gihulat nila ang resulta sa internal investigation sa TCC kabahin sa maong isyu.
Gipanganti usab ni Alvarez nga dunay masilotan kon ugaling mapamatud-an nga may kasal-anan ang kadagkuan sa maong tunghaan.
Dugtong usab niini,gibutyag ni TCC board of director Edmundo Pacamalan Jr sa Bombo Radyo pinaagi sa text message nga naghulat sila sa pormal nga reklamo aron imbestigaran ang maong kontrobersya.
Samtang motabang ang kapolisan nga kasuhan ang maong mga magtutudlo nga nagtanyag sa ‘sex for grade’ sa iyang mga magtutungha diha sa Tagoloan Community College.
Miingon si Police Major Allan Oñana, hepe sa Tagoloan Police Station nga iyang paningkamutan nga makuhaan sa affidavit sa ilang reklamo ang tulo ka complainants batok sa duha ka TCC officials.
Apan giangkon ni Oñana nga iya pang pugson ang mga complainant tungod kay mibati sila’g kahadlok tungod sa kadagko sa mga tawo nga sentro sa alegasyon.
