CAGAYAN DE ORO CITY, Philippines – Walay nabantayan nga presensya sa mga barko sa China Coast Guard atol sa inagurasyon sa PH-US Maritime Cooperative Activity sa West Philippine Sea (WPS) kagahapon Hulyo 31, 2024.
Gibutyag ni AFP Public Affairs Office (PAO) Chief Col. Xerxes Trinidad wala silay naobserbahan nga mga barko sa China partikular na sa exercise area gamit ang visual o radar monitoring.
Miingon si Trinidad nga natapos ang Maritime Cooperative Activity mga alas 6:00 sa gabie.
Ang ehersisyo gihimo sulod sa exclusive economic zone (EEZ) sa Pilipinas.
Ang hiniusang ehersisyo sa militar nakapunting sa pagpalig-on sa komunikasyon ug koordinasyon sa operasyon sa duha ka navy.
Lakip sa mga aktibidad nga gihimo mao ang communication checks, division tactics, ug cross-deck exercises.
Sa pikas bahin, namahayag si Philippine Navy Spokesman for West Phil Sea – Rear Admiral Roy Vincent Trinidad, nga ang maritime cooperative activity usa ka regular nga aktibidad uban sa ilang mga counterparts gikan sa lain-laing mga nasud sama sa America.
Gitin-aw usab ni Trinidad nga walay mga barko gikan sa Chinese PLA-N, CCG ug MMA ang nagsinamok sa palibot.
Una niini, gipalig-on sa Department of Foreign Affairs ang baruganan sa Pilipinas nga walay walay bisan usa ka pulgada sa teritoryo nga ilang ihatag taliwala sa paghinawod sa China sa West Philippine Sea.
