CAGAYAN DE ORO CITY – Gisibog una ni environment committee chairman Kag Eric Salcedo ang iyang resolusyon diin mag-imbistigar batok sa tulo ka Chinese mining companies nga utok sa pagkalot-kalot sa bukirang bahin sa syudad.
Kini human nasuta nga wala moagi sa pagtugot sa konseho ang soil exploration sa maong mga kompanya sa taas na nga panahon.
Miingon si Salcedo nga hatagan una niya’g higayon makatubag ang maong mga kompanya ayha mohimo’g aksyon.
Una niini,gikabalaka sa govt officials ang hilom nga land explorations sa maong mga kompanya ilabina nga mohatag kini’g peligro sa katawhan nga nanimuyo sa ubos nga bahin dinhi sa syudad.
Samtang gitin-aw ni DENR -Environmental Management Bureau o EMB-10 regional director Reynaldo Degamo nga dili pa kinahanglan magkuhag permit sa ilang buhatan ang tulo ka Chinese companies nga naghimo’g mining exploration sa bukirang bahin sa syudad.
Giklaro ni Degamo nga sa maong operasyon wala pa kini nagkihanglan sa mga rekisitos gikan sa ilang buhatan.
Dugang sa opisyal nga ang Mines Geosciences Bureau 10 ang magbantay sa kalihukan sa maong kompanya.
