CAGAYAN DE ORO CITY-Giakusahan ni kanhi USTP faculty member Architect Rey Galua nga planted ang mga ebedensiya nga gihinambog sa CIDG-10 ug ubang PNP units nga nakuha sa iyang pinuy-anan sa Gran Europa, Brgy Lumbia ning syudad.
Kini human kumpirmaha sa iyang abogado nga si Atty Arturo Ubaub nga lisensiyadong kalibre 45 ug 9mm pistols lamang ang gipanag-iya sa kliyente niini.
Miingon si Ubaub nga i-kuwestiyon nila ang pagka-rekober sa mga granada, kalibre 38 ug mga bala sa pinuy-anan ni Galua nga nagsilbi nang ebedensiya sa piskalya.
Si Galua gikasuhan sa pagbaton sa illegal nga mga armas ug mga granada sa piskalya ning syudad kagahapong adlawa.
Samtang gihimakak sa CIDG-10 nga planted ang mga armas nga nakuha gikan sa pinuy-anan ni Architect Galua.
Kini human unang giakusar sa maong Architect nga dili siya ang tag-iya sa duha ka granada, mga bala ug uban pang kontrabando nga nakuha sa PNP raiding teams.
Miingon si CIDG-10 chief investigator SPO4 Noel Oclarit nga nakasaksi ang mga brgy opisyal nga wala sila’y mga dala sa pagsilbi nila sa duha ka search warrants batok sa pinuy-anan ni Galua.
Dugtong niini, gihan-ay na sa kampo ni Galua ang ilang counter-affidavit batok sa duha ka non-bailable nga kasong gipasaka kaniya sa CIDG-10 sa piskalya.
Kini human nangayo si Galua sa preliminary investigation aron ihimakak ang pasangil sa CIDG-10 nga nagbaton siya’g daghang armas nga walay mga papeles.
Miingon ang abogado ni Galua nga si Atty Arturo Ubaub nga may panahon pa sila aron matubag nila ang tanang pasangil sa iyang kliyente.
Sa pagkakaron, hugot gibantayan sa CIDG-10 ang ospital diin naka-confine si Galua ning syudad.
