Nagpahimangno si City Councilor Roger Abaday ang katawhan sa kahinungdanon sa pagpakabana ug pagmatngon sa palibot human sa pagkadakop sa usa ka suspetsado sa pagpanulis sa Osmeña Street ning syudad sa miaging adlaw, samtang nakaikyas pa ang iyang kauban. Mapasalamaton matod pa si Abaday sa mga concerned citizens nga mitabang sa pagdakop sa usa sa mga gituohang tulisan ug nakapugong sa posibleng dugang pang insidente sa pagpanulis. Gitinguha karon ni Abaday nga hatagan ug komendasyon ang mga isog nga concerned citizens ug ang usa ka RTA nga unang miresponde sa insidente, tungod sa ilang talagsaong kaisog sa pagpanalipod sa komunidad. Dugang pa niya, usa ka citizens arrest ang nahitabo sa pagkadakop sa armadong lalaki diin nakarekober ang kapulisan og usa ka short firearm gikan sa suspetsado.
