CAGAYAN DE ORO CITY – Gipatubag sa kadagkuan sa Comelec si City Election Officer Atty Rowell Valledor ug ubang provincial board of canvassers chairmen kon nganong missing ang certificate of canvass o COCs sa pagka-presidente ug bise-presidente samtang gihagpat sa kauluhan.
Kini human unang gikadismaya ni Senate Majority Leader Jose Miguel ‘Migz’ Zubiri nga nalangan ang ilang canvassing kay gipangita pa ang COCs sa pipila ka lugar sa nasud.
Miingon si Comelec Commissioner George Garcia nga dili kalikayan nga mawani ang pagbutang sa mga importanteng dokumento tungod usab sa kadaghan niini gikan sa mga probinsya.
Una ang nagpalugwa’g memorandum si Comelec chairman Saidamen Pangarungan aron matubag sa election officers ang kapalpakan kay giingong naguba ang imahen sa ilang ahensiya atubangan sa publiko.
Samtang giklaro ni Comelec 10 Director Francisco Pobe Jr nga dili tinood nga nawala ang certificate of canvass o COCs sa mga boto pagka-presidente ug bise-presidente gikan sa syudad.
Miingon si Pobe nga wala sa kontrol sa city election officer ang pagsusi sa unod sa ballot box kay bugtong national board of canvassers lang ang dunay gahom sa paghimo niini.
Kini ang rason nga wala masuta daan nga negatibo ang ballot box sa COCs gikan sa dakbayan kay istrikto ang patakaran sa senado.
