CAGAYAN DE ORO CITY – Gi-depensa sa hawanan sa konseho ang kagustuhan sa pribadong gagmay’ng negosyante nga nag-interes pagbubo pamuhunan pinaagi sa katukuran sa Higalaay Festival Night Market sa Rio de Oro Boulevard isip dugang pagpa-bibo sa kapistahan sa syudad sa Agosto ning tuiga.
Kini human miani’g dili tiaw’ng batikos gikan sa mainstream ug social media platforms ang balor 50-mil pesos nga pangayo sa organizers sa tents nga rentahan sa intresadong gusto mag-negosyo sulod sa bulan sa Agosto.
Miingon si Kag. Romeo Calizo kinsa mihimo’g special report sa isyu nga dili kontra-kabus ang maong night market apan opsyon sa katawhan dalikyatan samtang saulugan ang kapistahan ni Sr San Agustin.
Siya miingon nga nagtira-pasagad lang ang pagbatikos apan nasuta nga naghinobra ang kakulang sa kahibalo sa detalyadong plano sa maong local investment.
Dumduman nga sa miaging semana,gipatawag ni committee on ways and means chairman Kag. George Goking ang tanang partidos nga apil sa night market diin naklaro nga dunay miscommunication lang ang nahitabo.
Miapelar si Goking nga dili angay mag-iya iya apan dungan nga lingkuran ang pagtuki sa mga kalihukan sa syudad aron kalikayan nga masubli ang batikos nga madawatan sa city govt sa main stream ug social media platforms.
