CAGAYAN DE ORO CITY – Nawad-an na sa iyang trabaho ang information technology (IT) expert nga trabahante sa city hall nga gi-hire sa laing obligasyong-pang-opisina sa Cagayan de Oro Water District o COWD ning syudad sa miaging semana.
Kini dili tungod kay gitangtang sa city government apan kay mihupas na job order employment sa IT expert nga si Freeje Padinit nga unang nadistino sa City Local Environment and Natural Resources Office o CLENRO.
Namahayag si CLENRO manager Engr Armen Cuenca nga sukad mibuto ang isyu nga gisudlan sa upat ka tawo nga naglakip kang Padinit ang data center room sa COWD ang wala na usab kini nagpakita pa sa trabahuan.
Nabaniug sa mainstream ug social media nga gilungkab ug dunay giingong gipanghilabtan nga sensitibong computer files ang COWD office rason nga naglikay nang magpakita sa publiko ang IT expert.
Gisaysay ni Cuenca nga subay sa pag-angkon usab ni Padinit sa gihimong imbestigasyon sa CLENRO nga gisugo kini ni interim COWD General Manager Fermin Jarales sa maong gimbuhaton sa miaging Hunyo 24 sa kagabii.
Apan sa interbyu usab sa prensa kang Jarales,bakak ang mikatap nga impormasyon nga dunay lungkab kay kanhi niya opisina ang iyang gipa-trabaho ni Padinit.
Siya miingon nga ayha kini mibalhin sa opisina ni COWD General Manager Engr. Antonio Young kay gipa-work from home,gigamit niya kadto nga temporaryong trabahuan.
Hisayrang sugod petsa 26 sa Hunyo 2024, nag-absent without leave na ang IT expert sa iyang trabaho sa CLENRO.
