CAGAYAN DE ORO CITY – Gipa-aktibo ni City Mayor Rolando ‘Klarex’ Uy ang mobilisasyon sa puwersa sa city hall alang paghakot sa nagtapund-og nga mga basura sa pipila ka bahin sa dakbayan.
Kini human naputos sa daghang reklamo ang city govt nunot sa mga basura nga pila ka adlaw nang wala makuha sa 3rd party contractor nga mao ang TENCIL.
Giklaro ni Janboy Actub,tigpamaba ni Uy nga pabiling aktibo pa ang kontrata sa maong kompanya alang sa minilyong naka-kontrata nga tahas niini sa syudad.
Namahayag si Actub nga wala na kini maghulat pa nga mograbe pa ang suliran sa mga wala makuha nga mga basura ug gitabangan na sa syudad ang kompanya nga natahasan niini.
Siya miingon nga angayang mosubay usab sa katawhan sa pagpahimutang sa ilang mga basura sa ensaktong oras aron seguradong makuha sa mga kolektor sa basura.
Hisayrang duol nang matibawas ang kontrata sa TENCIL hinungdang nagduda ang pipila nga giminusan na usab nila ang ilang mobilisasyon sa ‘garbage collection.’
