CAGAYAN DE ORO CITY – Nakaggawas na sa hospital ang tulo ka mga biktima nga naangol dihang maigo sa ipo-ipo sa sentrong bahin sa syudad sa Marawi.
Sa ekslusibong pakighinabi sa Bombo Radyo, gibutyag ni 103rd Infantry Brigade, Philippine Army commander Army Col. Jose Maria Cuerpo nga nadala sa kusog nga hangin ang gisakyang motorsiklo sa mga biktima.
Pipila usab ka mga kabalayan ang nadaut dihang gipalid sa hangin ang ilang mga atop. Gani, bisan ang session hall sa City Hall ang gidaut sa ipo-ipo ingon man pipila ka mga commercial buildings.
Samtang gihulatan sa Lanao del Sur Provincial Disaster Risk Reduction and Management Department o PDRRMD ang report sa City Engineering Office kalabot sa natalang damyos sa ipo-ipo nga miigo sa Marawi City.
Miingon si PDRRMD head Amer Hussein Lucman nga ila usab sutaon kung adunay casualties sa hitabo.
Una nang gibutyag ni Lucman nga nakita nila ang buhawi nga naggikan sa Lake Lanao padulong sa sentrong bahin sa syudad.
Hisayran nga pipila ka kadalanan sa maong lugar ang dili pa maagian tungod sa mga dagkong kahoy nga nangatumba epekto sa ipo-ipo.
