CAGAYAN DE ORO CITY-Gikompirmar sa kampo ni City Mayor Oscar Moreno nga nadawat na nila ang dismissal order nga gipahamtang sa Ombudsman.
Gibutyag sa legal counsel ni Moreno nga si Atty Dale Brian Mordeno nga miduso na sila’g petisyon sa Court of Appeals-Manila aron malugwa ang status quo ante order nga pugngan ang pagpapha kang Moreno.
Si Moreno kuyog ang laing mga department head kaniadto sa Misamis Oriental ang gisang-atan sa 48 ka kaso sa Ombudsman diin 24 ang administratibo ug laing 24 kriminal didto sa Sandiganbayan.
Samtang gitahod sa testigo nga si Engr Antonio Nunyez ang opinyon ni Atty Mordeno kabahin sa pagka-dismiss ni City Mayor Moreno.
Miingon si Nunyez nga angay pasagdan nga mismo ang balaod ang mohubad sa kaugalingong legal nga kahulugan niini.
Si Nunyez ang mikaso batok Moreno ug pipila ka department heads kaniadto tungod sa giingong wala pag-agi sa public bidding sa mga transaction sa lalawigan samtang kini nagsilbi pang gobernador.
