Pakasuhan sa Streetlight: Suga Sa Dalan Organization Inc. ang bisan kinsang hamtong nga mahimong rason sa sayong pagmagdus sa usa ka batan-on, tungod kay kini giila sa balaod isip statutory rape.
Namahayag sa Bombo Radyo ang administrator sa organisasyon nga si Marion Sorio nga bisan tinguha nilang motabang sa mga batan-on nga anaa sa maong sitwasyon, dili matod pa sila magpaka-buta ug magpaka-bungol sa klarong paglapas sa balaod.
Gipasabot ni Sorio nga ang usa ka hamtong nga anaa na sa insaktong pangidaron ug kahimtangan sa panghunahuna adunay responsibilidad nga dili mosulod sa relasyon sa mas bata pa kaniya.
Butyag niya nga bisan pa og nagminahalay ang usa ka menor-de-edad ug usa ka hamtong, dili gihapon niini mabag-o ang sala nga klarong gilatid ug bawal sa balaod.
Dugang pa ni Sorio, ang proteksyon sa mga batan-on maoy una nga tumong sa maong balaod aron malikayan ang pag-abuso ug pagsamantalaha.
Matod pa niya, kung dili gayud malikayan nga mahitabo ang maong buhat, panahon na nga kini hisgutan ug ipasabut sa kadaghanan aron masabtan nganong hugot kining gidili sa balaod.
