CAGAYAN DE ORO CITY – Miani’g pag-uyon sa mayoriya ang sugyot -ordinansa ni 2nd District Konsehala Girlie Balaba nga ma-preserbar ang clay products production sa Brgy Bulua ning syudad.
Kini human himu-i’g special report ni Balaba sa regular session sa City Council nga gidumala ni City Vice Mayor Jocelyn ‘Bebot’ Rodriguez nga angayang maproteksyonan ang produksyon sa katawhan gamit ang clay o talagsaong yuta nga sa maong barangay lang makit-an.
Siya miingo nga gawas nga preserbasyon kini,magsilbi usab kining dugang padagsa sa turismo sa syudad.
Dugtong niini, nakuha sa konsehala ang suporta sa kadaghanan rason nga gisugyot nga ipaubos kini sa dugang pagsusi ug konsultasyon aron mas mahatagan sa pagtagad ug igong pondo ang clay product makers sa nahisgutang lugar.
Dumduman nga makita sa national highway ang dakong ‘banga’ o kolon nga nagsimbolo nga adunahan sa clay ang nahisgutang lugar.
Hisayrang subay sa special report ni Balaba nga nagsugod sa clay production sa Brgy Bulua ang duha ka German nationals nga naka-asawa sa duha ka Pinays ayha napasa sa mismong mga nanimuyo sa lugar ang nahisgutang abilidad hangtod ning panahona.
